شعر- سعيد شحاته:

عَدّوا الكنال بالدبابات والأفئده الصافيه
عِدّوا الرِّجول الماشيه تقطع في السكك حافيه
عادي أمّا أقول إن البدن مضطر 
وان الطريق رغم العرق مش حرّ
وان المراكبي أكيد هيوصل برّ
طول ما القلوب متطمنّه ودافيه 
عَدّي الكنال بالورد والزينه
واسقينا من زمزم ووضينا
واقفين نراهن باللي في إيدينا 
ومصممين ع الحلم بالعافيه
عَدّوا الكنال بالعزم والهمّه
بالخيش وبالمريله وبالبدله والعمّه
الخير بيظهر بصبر الصحبه واللمّه
والمصري وقت الصعاب بيساوي ميت أُمّه 
عاشق ودمّه المدد والكلمه مش كافيه
عَدّوا الكنال بالقلل والخُضره والبلاليص 
واتحدّوا صمت الخطاوي وكسّروا المتاريس 
-إحنا المدافع وصوت الدبابات إحنا
وإحنا اللي ساعة العمل ع الجبهه بسلاحنا 
واحنا اللي وقت الكفاح بيباهوا بكفاحنا- 
واحنا اللي قادرين نقف للدون وللجواسيس 
وإحنا العيال البريئه المخلصه الوافيه
عدّي الكنال بالأمل وبروح حواريكي قلبي المغامر مصمم ينطلق فيكي
يا بنت ناسك وناسك كلّهم ليكي 
صنعة إيديكي وإيديكي بتحكم القافيه
عِدّي الرجول الماشية تقطع في السكك حافية
عِدّي القلوب المخلصة الدافية
عَدِّي اللي واقفين زيّ يوم الدّين
ومصممين ع الحلم بالعافية