شعر- محمد حسني إبراهيم:

" الليلة نًفس الحيطان بيهز ورق الشجر ويدفى قلب الشوارع ويدوب فى تلج الاسئله ؟؟
ويسيب لصورتــــــــــــى حلاوة المنظر"

أخرج من التواريخ حكاية
أو على الجدران خطـــــــــــــــوط
يمكن شطوط تمسح ف قلبى ملحتك
طعم النبوة خلاص عرفته
لما لميتى إيديا م الهــــــوا
ومشينا ع الأيـــــــــــــــــــــــــــام
نرجع نقدم خطونا
نفس الحيطان بيلمنا
جلابية واحده لونها ابيض من حليب الأمهات
وعرايا من كل الدموع
- بينى وبينك تسقط السكه
ونضم فينا مركبه
بينى وبينك تتولد ضحكه
والشمس لينا قريبه
تقلب صورنا من على الحيطه القديمه
ترد فينا نبضها
ترانيم مع الخطوة بترسم طلعتى
تراتيل مع طلعتك بتطهر الخطوه
كل اللى ف الدنيا بلابل ينشدوا
آه ياحبيبتى معبد الحواديت
يستنى فينا نكمله
والنخل طارح من جدوره صدقينى دا السحاب
اتمنى يومها لو يكــــــــــون سجاده ويبوس القدم
خًطى وخُشـــــــــــى فرحتى
سًمى على اللى كان ف قلبى من خشوع

باسم اللى جراكـــــــــى ف الشهد من ريقـــــــــى
واسم اللى رســــــاكــى على قلبى وطريقـــــــــى
ياطالعه قلبـــــــــــــــــى قلبى طلع ليكـــــــــــــــــى
يانابته حب اللقـــــــــــــا والحب ماليــكـــــــــــــــــى
سًمى وخًشى غنوتى
سميت وداخل فوق شفايفك
حرف شايــــــــــفك
زًملينى من جمال طلعة عنيك
رُدى إليـَـــــــا رعشتى
سامحينى ماقدرتش أكــــون
سامحينى ماقدرتش أكــــون

_______________

الشاعر في سطور

شاعر عامية عضو اتحاد كتاب مصر
له من الدواوين
مواسم للعطش والجوع سلسلة أصوات أدبية 1995
اول خطاوي العشق موت طبعة خاصة 1997
عرايس النيل سلسلة النشر الإقليمي 2000
المكان جواك محاصر دار اكتب 2008
انا الشرير بتاع الورد دار أرابيسك 2009
السما بتمطر أرواح 2010 دار ايزيس
طوابير فرح جامعة الفيوم 2011
تكتب جناحين وتطير بيهم دار الادهم 2012
آخر مابينا ضحكتك دار النسيم 2013
ديوان رباعيات إصدار خاص منتدى بداية2014
الأسامى دار الادهم 2015
هشتاج لقلب ب يستخبى فى الوجع دار النسيم 2017
ماتيسر من غرام دار النسيم 2018
لف وارجع الهيئة العامة للكتاب 2022