اغسل همومي
شعر: أحمد فؤاد
من ديوان ضحكة فى الليلة الحزينة
يمكن تعود الروح
يمكن الاقى الفكرة
يمكن ابات مجروح
واغسل همومي بكره
انا والطريق نتسابق
انا قلت يمكن فارق
بصيت اوي ف عينيه
ماضحكش طيب ليه
قاللي النهارده السبت
وانا قولته مش فارقة
ده السبت كان امبارح
وطلعته جت سرقه
كشفت عيونها جماله
طلقت رموشها ف قلبي
وانا كل يوم مش فاضى
احسب جراحها لقلبي
تحت القميص الكحلي
دافن طموحي وحلمي
ماتكسر البراويز
ماتفوق بقى وصحصحلي
واقف ع التسريحة
خطفت صباع الروج
يمكن تكون خدعتني
وعشقت الاراجوز
كل النايات دي بتبكي
وانا وحدي عايز اغني
طال المعاد مع اني
واقف هنا من بدري
يمكن تعود الروح
يمكن الاقى الفكرة
يمكن ابات مجروح
واغسل همومي بكرة
كاتب صحفى بالعديد من الصحف اليومية العربية يدير صالون التجديد الفكري الشهري بالقاهرة
له ثلاث دواوين مطبوعة ضحكة فى الليلة الحزينة _ ورافض اكون ساكت _ ومواسم لبيع الأوطان
